Espainiako Ministroen Kontseilua

Espainiako Ministroen Kontseilua Gobernuko presidenteak, presidenteordeek, ministroek eta legeak ezarritako bestelako kideek — Estatu idazkariak kasu batzuetan — osatzen duten organo kolegiatua da. Normalean, ostiralero biltzen da Madrilgo Moncloako jauregian. Ez-ohiko egoera batean, Espainiar estatuko beste hiri batean biltzea ahalbidetzen du Konstituzioak. Halaber, kontseiluaren buru Erregea izatea posible da ez-ohiko egoeretan, Gobernuko presidentearen eskaeraz.

Ministroen kontseiluko idazkari gisa Presidentetza Ministroak jarduten du eta bilerek karaktere erabakikorra izan dezakete. Organo kolegiatua denez, bertan hartu beharreko erabakiek gehiengo absolutua behar dute.